Gayatri Ashtakam

sha.nkarAchAryavirachitam ..

vishvAmitrapaHphalA.n priyatarA.n viprAlisa.nsevitA.n
nityAnityavivekadA.n smitamukhI.n khaNDendubhUShojjvalAm .
tAmbUlAruNabhAsamAnavadanA.n mArtANDamadhyasthitA.n
gAyatrI.n harivallabhA.n triNayanA.n dhyAyAmi pa~nchAnanAm .. 1 ..

jAtIpaN^kajaketakIkuvalayaiH sa.npUjitAN^ghridvayA.n
tattvArthAtmikavarNapaN^ktisahitA.n tattvArthabuddhipradAm .
prANAyAmaparAyaNairbudhajanaiH sa.nsevyamAnA.n shivA.n
gAyatrI.n harivallabhA.n triNayanA.n dhyAyAmi pa~nchAnanAm .. 2 ..

ma~njIradhvanibhiH samastajagatA.n ma~njutvasa.nvardhanI.n
viprapreN^khitavArivAritamahArakShogaNA.n mR^iNmayIm .
japtuH pApaharA.n japAsumanibhA.n ha.nsena sa.nshobhitA.n
gAyatrI.n harivallabhA.n triNayanA.n dhyAyAmi pa~nchAnanAm .. 3 ..

kA~nchIchelavibhUShitA.n shivamayI.n mAlArdhamAlAdikAn
bibhrANA.n parameshvarI.n sharaNadA.n mohAndhabuddhichchhidAm .
bhUrAditripurA.n trilokajananImadhyAtmashAkhAnutA.n
gAyatrI.n harivallabhA.n triNayanA.n dhyAyAmi pa~nchAnanAm .. 4 ..

dhyAturgarbhakR^ishAnutApaharaNA.n sAmAtmikA.n sAmagA.n
sAya.nkAlasusevitA.n svaramayI.n dUrvAdalashyAmalAm .
mAturdAsyavilochanaikamatimatkheTIndrasa.nrAjitA.n
gAyatrI.n harivallabhA.n triNayanA.n dhyAyAmi pa~nchAnanAm .. 5 ..

sa.ndhyArAgavichitravastravilasadviprottamaiH sevitA.n
tArAhIrasumAlikA.n suvilasadratnendukumbhAntarAm .
rAkAchandramukhI.n ramApatinutA.n shaN^khAdibhAsvatkarA.n
gAyatrI.n harivallabhA.n triNayanA.n dhyAyAmi pa~nchAnanAm .. 6 ..

veNIbhUshitamAlakadhvanikarairbhR^iN^gaiH sadA shobhitA.n
tattvaj~nAnarasAyanaj~narasanAsaudhabhramadbhrAmarIm .
nAsAla.nkR^itamauktikendukiraNaiH sAya.ntamashchhedinI.n
gAyatrI.n harivallabhA.n triNayanA.n dhyAyAmi pa~nchAnanAm .. 7 ..

pAdAbjAntarareNukuN^kumalasatphAladyurAmAvR^itA.n
rambhAnATyavilokanaikarasikA.n vedAntabuddhipradAm .
vINAveNumR^idaN^gakAhalaravAn devaiH kR^itA~nchhR^iNvatI.n
gAyatrI.n harivallabhA.n triNayanA.n dhyAyAmi pa~nchAnanAm .. 8 ..

hatyApAnasuvarNataskaramahAgurvaN^ganAsa.ngamAn
doShA~nchhailasamAn pura.ndarasamAH sa.nchchhidya sUryopamAH .
gAyatrI.n shrutimAturekamanasA sa.ndhyAsu ye bhUsurA
japtvA yAnti parA.n gati.n manumima.n devyAH para.n vaidikAH .. 9 ..

iti shrImatparamaha.nsaparivrAjakAchArya
shrImachchha.nkarAchAryavirachita.n gAyatryaShTaka.n sa.npUrNam